Little League baseball, magandang 'training ground' sa buhay Para kay Justin Zialcita, business development manager ng Mizuno Philippines at isang entrepreneur, nagsilbing magandang “training ground” ang paglalaro niya ng baseball sa Little League upang mahubog ang kanyang katauhan at maging handa sa hamon ng buhay kalaunan.

“Masasabi ko na marami akong natutunang values sa Little League,” ani Justin, na siyam na taong naglaro sa liga, mula sa Minor League division hanggang sa Big League.

Unang-una aniya dito ang disiplina. 
“Sa murang edad, habang sa video games at laruan nahuhumaling ang ibang bata, nasa labas ako ng bahay sumasambot ng bola at nagsasanay kasama ang aking ama,” kwento niya. “Puro hard work ako noon, wala halos summer break pero ganito ang aking ginusto.”

Nariyan din ang katatagan. 
“Dahil sa baseball, natuto akong hindi sumuko. Naalala ko pa noong ako’y 13 taong gulang pa lang, sinabi sa akin ng aking ama na ituring ang bawat inning na ninth inning sa isang tablang laro at ito’y tumatak sa aking isipan at puso hanggang ngayon, dala-dala ko sa lahat ng aking ginagawa,” litanya niya.

Ang pagsusumikap.
“Nabanggit ng isa sa mga naging coach ko na mayroong isang tao sa ibang lugar na nagsusumikap nang mas doble sa ‘yo sa kagustuhang talunin ka.’ Naniniwala ako na kung may nais kang makamtan, pagsumikapan mo ito, hindi ito darating na lang sa iyo,” giit ni Zialcita.

Natutunan niya rin ang kahalagahan ng preparasyon.

“Noong ako’y nasa high school, habang nagpa-party tuwing Byernes ng gabi ang mga kamag-aral ko, ako’y nasa tahanan lang namin at naghahanda pisikal at mental para sa laro kinabukasan. Gumagawa ako ng 200 practice swings at 200 towel throws bago matulog noon.

“Maaga akong natutulog at sinasaisip kung ano ang gagawin sa laro kinabukasan at kung sino ang makakaharap ko sa kalaban. Ganito rin ako sa aking trabaho, naghahanda ako nang mabuti sa mga pagpupulong o interview na pupuntahan ko. Halimbawa may meeting kami ng isang malaking kliyente; nagsasagawa muna ako ng pagsasaliksik tungkol sa kompanya at sa mismong kliyente.

“Tuwing umaga sa opisina, sinusulat ko ang deliverables at responsibilities ko sa araw na iyon at iniisip mabuti kung paano makakamit nang maayos.

” Nariyan din ang teamwork. “
Aking natutunan sa baseball na daig ng isang koponan na may teamwork at chemistry ang isang koponan na may superstar ngunit wala namang teamwork. Isang napakandang bagay iyong magtrabaho kayo para sa iisang mithiin, isantabi ang mga pagkakaiba para makamit ito,” patuloy niya.

Isa pa ang integridad.
“Mas nanaiisin ko pang matalo kesa manalo sa pandaraya,” pahabol niya.

At maging sa pagkatalo ay may natutunan si Justin.

“Natutunan ko kung paano gawing positibo ang isang pagkatalo. Kung noong una ay nagagalit ako sa pagkatalo, noong lumaon ay natutunan kong tanggapin na naging mas mahusay sa amin ang katunggali at magsilbing leksyon ito para mas magpahusay pa at magsikap kami.

“Ganyan din sa buhay, hindi lahat puro kaligayahan at magagandang bagay. Bibigyan ka niya ng ‘curve balls” paminsan-minsan, bibigyan ng matitinding hamon at pahihirapan kang bumangon. Hindi ako sumusuko kapag may ganyang sitwasyon. Pinag-aaralan ko lang kung ano ang kamaliang nagawa ko at sisiguraduhing hindi ko ito uulitin pa.

” Dahil dito, hihikayatin ni Justin ang kanyang magiging supling at ang ibang kabataan na maglaro rin ng baseball.

“Isang napakagandang laro ang baseball at may malaking potensyal ito sa Pilipinas,” aniya.

Mayroon siyang payo sa mga paslit na nagsisimula pa lamang sa Little League.

"Tuloy-tuloy lang ang hard work. Hindi madali ang baseball/softball. At paminsan-minsan, makakaranas ka ng kabiguan, pagsumikapan lang at ito'y magbubunga sa huli. Makinig sa coaches. Makipagkaibigian. Mag-enjoy. Ito'y isang laro na dapat magdulot ng kasiyahan," panapos ni Justin. 

Isa si Jessel Taladtad sa mga taga-probinsya na nabigyan ng pagkakataon na makarating sa Maynila dala ang angking galing sa softball at determinasyong magtagumpay, nagpursigi at ngayo'y nagtatamasa ng magandang estado sa buhay.


Habang naglalaro ng softball sa Little League Philippines at nang lumaon sa UAAP, matiyagang nagsunog ng kilay ang tubong Bacolod na si Taladtad upang makatapos ng kursong accountancy sa Adamson University at makapasa sa board.

Dahil sa tyaga, isa nang CPA ngayon si Jessel at nagtatrabaho sa isang malaking kumpanya, ang
Coca-Cola Philippines.
Aniya, malaking bagay ang natununan niya sa Little League sa loob ng pitong taon (1999-2006) sa pagtahak niya sa ninanais na landas.

"Napagtanto ko na malaking bentahe pala ang pagiging atleta sa corporate world, lalo na sa ugali at pagiging team player," sabi ni Jessel. "Yung mga naging karanasan ko ang nagturo sa akin na maging matatag sa pagharap sa mga hamon ng buhay at maging mapagbigay at ibahagi ang aking tagumpay sa iba." "Disiplina rin ang tumulong sa akin sa pag-aaral lalo na noong ako'y naglalaro sa UAAP habang nagtitiyagang makakuha ng university degree at nang lumaon makapasa sa CPA board exam," kanyang ibinahagi.



Unang naglaro si Jessel sa Bacolod City noong 1999 at 2001 hanggang 2004 sa Little League, Senior League at Big League. Nang mga sumunod na taon, Manila naman ang kanyang dinala para sa Big League division. Nakarating si Taladtad sa World Series sa Amerika nang apat na beses, isang hindi malilimutan niyang karanasan. "Nabigyan ako ng pambihirang pagkakataon na makita ang kabilang parte ng mundo sa murang edad. Napalawak nito ang aking pananaw sa buhay," hirit niya.

Sa paglalaro niya natutunan ang kahalagahan ng disiplina sa sarili, determinasyon at dedikasyon na mapabuti pa lalo ang sarili. "Namulat ang kamalayan ko sa pagiging responsable. Sa labas ng field, binigyan kami ng gawaing katulad ng paghugas ng pinggan, paglinis ng dorm, pagluto ng pagkain, paglaba ng sariling damit at paglinis ng cabinet. Mga simpleng gawain lamang ito pero naging magandang pagsasanay ito upang matuto akong hindi maging palaasa sa iba," kuwento ni Jessel. Nais niya ring maranasan ng mga kabataan ng ganitong ekspiriensya. "Hindi lang kasi pisikal na aspeto ang napapaganda ng sports, may makukuha pang benepisyo sikolohikal at emosyonal," giit ni Taladtad. Bilang payo sa kabataang nagsisimula pa lamang sa Little League, sinabi niyang mag-enjoy lang sa paglalaro.



"May mga values kayong matututunan na pagdating ng araw ay magiging second nature sa inyo sa pagharap sa mga hamon ng buhay. Kapag dumating sa puntong ganito, taas-noo mong gugunitain ang landas na pinagdaanan," panapos ni Jessel.

Mula sa munting palaruan ng baseball sa kanyang hometown sa Tanauan, ngayon ay ang makinis at magarang field na ng ekslusibong club sa Makati naman ang “playground” ng dating Little League player na si Rhoy Landicho.

Si Landicho ay kasalukuyang Sports and Athletics Assistant Manager ng ekslusibong club sa Makati, kung saan siya ay nangangasiwa sa mga sports facilities nito tulad ng field, tennis court, badminton court, squash court at swimming pool.

Tungkulin niya ang wastong pangagalaga sa mga nasabing pasilidad pati na ang pamamahala sa mga sports coordinators at pagtatalaga sa mga responsbilidad ng bawat isa.
Ang dating guro at coach rin ang responsable sa pagplano at pag-organisa ng mga palaro para sa mga kasapi ng club, kabilang na ang pagpapatupad ng mga patakaran at regulasyon.
Para kay Landicho, naging malaking tulong ang kanyang karanasan sa Little League sa kanyang napiling propesyon.

“Maraming lessons akong natutunan sa Little League at una na rito ang preparasyon. Bago ka sumabak sa Little League, bilang manlalaro man o coach, dapat maghanda ka nang husto upang maging mahusay ang performance at talunin ang mga kalaban. Ganyan din sa buhay, kailangan may preparasyon para magtagumpay; hindi naman kasi ito makukuha overnight,” salaysay niya.
Limang taong naglaro si Landicho sa iba’t ibang age-group  ng Little League para sa Tanauan at nang lumaon ay nag-coach na ng koponan niya sa Big League.
Noong 2010, katuwang ang mga “volunteer parents,” tinatag nila ang Lipa Barakitos at si Landicho ang nag-gabay sa koponan sa major division sa loob ng dalawang taon.
“Marami akong magagandang karanasan noong panahon ko sa Little League. Hindi ko malilimutan yung pagpunta ko sa iba’t ibang lugar tulad ng Baguio at para sa isang first-timer, hinding hindi ko malilimutan yun,” hirit niya.
“Maraming kaibigan akong nakilala Sa Little League na hanggang ngayon ay nakakasama ko po sa mga lakaran,” dagdag pa niya.
Para kay Landicho, ang Little League ang nagtuturo sa bawat manlalaro nang magandang kaugalian.“Disiplina, pagkakaisa, tiwala, commitment at paggalang sa kapwa,” kanyang sambit.
Kaya naman hindi mag-aatubiling himukin ni Landicho ang mga kabataan na maglaro rin.
“Hindi man sa Little League, kahit anong sports. Maraming matutunang aral sa buhay ang mga bata pag nasa sports sila at magkakaroon ng active at healthy na lifestyle pa,” pahabol niya.

RHOYWORK
Ang kanyang mensahe sa mga kabataan: “Sumali sa Little League at mag-enjoy. Marami kayong matutunan, sigurado yan!”
Little League Philippines 2018 Website design by: Jenno Camo Web Design and Develoment

Search